［職場三分親系列］
剛剛收到公司的電郵，很高興的告訴大家，我們部門將會改名。
Junior妹妹：嘩！全球部門改名呀，個新名都幾好呀。
我：（翻白眼）好個鬼！
Junior 妹妹：你唔鍾意個新名咩？
我：唔關個名事，你諗下公司個部門好地地做咩事要改名？
Junior 妹妹：唔….
我：唔好諗公司，你諗下啲明星，點解有啲明星會每隔幾年就改名？
Junior 妹妹：因為紅唔起！
我：Exactly! 紅得起，名就係branding，紅唔起，就要洗底。
Junior 妹妹：咁即係公司覺得我地個部門做得唔好？
我：似乎係了，你諗下我地公司咁識計數，無端端改一個部門的名，牽涉成千幾兩千人，淨係每個部門印過曬啲卡片同flyers，都起碼唔見六位數字，玩到咁大，唔會只係呢一步，仲要年底先黎做咁大改動… 不單純啊…
Junior 妹妹：咁會點呀？
我：我點知？我又唔係高層，純粹有唔好的預感，呢排大家做野小心啲，唔好俾人捉到，最壞的情況，可能會想炒人都唔定。
Junior 妹妹：炒人咁嚴重？唔會掛？公司應該有錢賺架？
我：拿，首先，公司有錢賺同炒唔炒你係兩回事來的，如果炒左你可以慳更加多，佢仍舊會手起刀落的，錢無人嫌多。第二點，我地做marketing，我地應該好清楚「名字」的作用，必理痛有一隻產品，叫必理痛經痛配方，貴過普通必理痛，但你如果留意一下佢個成份，其實係同普通必理痛一模一樣，只係個名唔同，但大家就信左呢一隻係特別用來止經痛的。改了名字，我們就好自然地相信和接受內容會有所不同，回到公司方面，一個部門有啲咩成份？
Junior 妹妹：人？
我：沒錯，部門轉了名，大家就很易相信和接受一個部門的成份，即是員工會有所不同了。將來炒人，就不是叫「裁員」，而是「人事變更、架構重組、精簡人手」，好聽多了…
Junior 妹妹：(若有所思) …………..
我：繼續工作吧，當一日的和尚還是要唸一日經，我同你兩個人工已經低得好折墮，炒十個都冇意思，況且我地搵工容乜易，炒左都唔驚，係都係班中層冗員先擔心吧！或許可能是我多心了，到最尾咩事都冇呢？（眉頭一挑，深深地望了某位正在無所事事的同事一眼）
#聖誕快樂
#養肥雞鴨先屠宰是常識吧
#願機會永遠對你有利
#我冇幫必理痛賣廣告
Search